دەستەی گشتیی ناوچە کوردستانییەکانی دەرەوەی ئیدارەی هەرێم بڵاویکردەوە، بە نیگەرانی و گومانەوە لە ئەنجامدانی سەرژمێریی گشتیی دەڕوانن و ئاشکراشیکرد، لە شاری هەولێر دیدارێکی سیاسی لەگەڵ کۆی هێزە کوردستانییەکانی ناوچەکانی دەرەوەی ئیدارەی هەرێم لەو بارەیەوە رێکدەخەن.
دەستەکە لە راگەیەندراوێکدا بڵاویکردەوە، بێگومان ئەنجامدانی سەرژمێری بابەتێکی گرنگە و راستەوخۆ گرێدراوی کۆی لایەنە جیاوازەکانی ژیانە و بە هۆیەوە دەوڵەت باشتر دەتوانێت سوود لە تواناکانی ببینێت و هۆکارێکی بنچینەیی پێشکەوتنەکانی لەسەر بەندە لەم چوارچێوەیەدا پشتیوانیکردن لە سەرژمێری کارێکی تەواو راستە.
ئاماژەی بەوەشکرد، ئێمە بە نیگەرانی و گومانەوە لە ئەنجامدانی ئەم پڕۆسەیە ئەڕوانین لە ناوچە کوردستانییەکانی دەرەوەی ئیدارەی هەرێم چونکە لە لایەک ماددەی 140 ی دەستوور جێبەجێنەکراوە و لە لایەکی دیکەش مێژووی سەرژمێریەکانی رابردوو ئەزمونێکی تاڵ و کاریگەری خراپیان لەسەر نیشتیمانەکەمان دروستکردووە.
ئاشکراشیکرد، ئێمە لە دەستەی ناوچە کوردستانییەکان ئامادەکاریی تەواومان کردووە سبەینێ لە شاری هەولێر دیدارێکی سیاسیی لەگەڵ کۆی هێزە کوردستانییەکانی ناوچەکانی دەرەوەی ئیدارەی هەرێم ڕێکبخەین و بە وردی هەڵسەنگاندن بۆ ئەم پڕۆسەیە ئەنجام بدەین تواناکانیش یەک بخەین بە ئاڕاستەی گەڕانەوەی تەواوی ئاوارە و خەڵکی خۆڕاگری ئەو ناوچانە کە ئێستا لە شارەکانی دیکەی هەرێمی کوردستان دەژین.
