دادگای فیدڕاڵی بڕیار لەسەر سکاڵایەکی یەکێتی دەدات

دادگای فیدڕاڵیی عێراق لەسەر سکاڵایەکی زیاد جەبار کۆدەبێتەوە، کە سکاڵاکە تایبەتە بە یەک بازنەیی هەڵبژاردن و ژمارەی کورسیی پێکهاتەکان لە پەرلەمانی کوردستان.
بڕیاروایە رۆژی یەکشەممە شەشی ئەم مانگە، دادگای فیدڕاڵیی عێراق کۆببێتەوە و تاوتوێی ژمارەیەک سکاڵای یاسایی بکات، کە یەکێکیان سکاڵایەکی زیاد جەبار سەرۆکی فراکسیۆنی یەکێتییە لە خولی پێنجەمی پەرلەمانی کوردستان.
زیاد جەبار سکاڵای لەسەر سەرۆکی خولی پێنجەمی پەرلەمان و سەرۆکی حکومەت و سەرۆکی هەرێمی کوردستان تۆمار کردووە و داوا دەکات، دادگای فیدڕاڵی ماددەکانی (یەک و نۆ و 15 و 22 و 36)، لە یاسای هەڵبژارنەکانی هەرێمی کوردستان بە نادەستووری دابنێت.
ماددەی یەکی یاسای هەڵبژارنەکانی هەرێم ژمارەی کورسییەکانی پەرلەمانی کوردستانی بە 111 کورسی دیاری کردووە، هەروەها ماددەی نۆ، هەرێمی کوردستانی وەک یەک بازنەی هەڵبژاردن دیاری کردووە، هەروەها ماددە 15 تایبەتە بە تۆماری دەنگدەران و ماددەی 22 لیستی پاڵێوراوی قەوارە سیاسییەکان، ماددەی 36 تایبەتە بە کورسیی پێکهاتەکان.