دەزگای ئاسایشی هەرێمی کوردستان دەستبەسەر زیاتر لە 41 ملیۆن دیناری عێراقی ساختەدا دەگرێت و گومانلێکراوێکیش دەستگیردەکات.
لە راگەیەندراوێکدا دەزگای ئاسایشی هەرێمی کوردستان بڵاویکردەوە، بەڕێوەبەرایەتیی ئاسایشی راپەڕین دەستیگرتووە بەسەر 41 ملیۆن و 500 هەزار دیناری عێراقیی ساختەدا.
دەزگای ئاسایش دەڵێت، گومانلێکراوێکیشیان بەناوی ( ع، ح، ج ) لە سنووری ئیدارەی راپەڕین دەستگیرکردووە.
بەپێی راگەیەندراوەکە سەرجەم ئەو بڕە پارەیە بەشێوەی 25 هەزاری بووە و لە دەرەوەی عێراق دروستکراوە و بەنیازی ساغکردنەوەی بووە لە ناو هەرێمی کوردستان و ناوەڕاست و باشووری عێراق.
ئێستا تۆمەتبارەکە بە ماددەی 281 لە یاسای سزادانی عێراقی راگیراوە.
