جێگری سەرۆكی رێكخراوی یەكێتیی مامۆستایانی كوردستان رایدەگەیەنێت، لەگەڵ كۆمپانیایەك لێكتێگەیشتنیان كردووە كە ئۆتۆمبێل بە نرخێكی كەمتر بۆ مامۆستایان دابینبكرێت و لە چەند رۆژی داهاتوودا دەخرێتە بواری جێبەجێكردنەوە و مامۆستایان دەتوانن لە رێگای لقەكانی یەكێتیی مامۆستایانەوە لە وەرگرتنی ئەو ئۆتۆمبێلانە سوودمەندبن.
عەبدولواحید محەمەد جێگری سەرۆكی رێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای راگەیاند، لێكتێگەیشتن لەگەڵ كۆمپانیایەكی بواری ئۆتۆمبێل كراوە كە بە شێوەی قیست و بە پێشەكییەكی كەم ئۆتۆمبێل دەدرێتە مامۆستایان كە ئەگەر مامۆستاكە هەزار دۆلار پێشەكی بدات دەتوانێت ئەوەی دیكەی مانگانە بە قیست بدات و بۆ هەر مانگێك 370 دۆلار بداتەوە، ئەگەر پێشەكی پێنج هەزار دۆلار بدرێت ئەوا 280 دۆلار مانگانە دەدات.
ئاشكراشیكرد، ئۆتۆمبێلەكان مۆدیلیان لەنێوان2021 – 2023دا و گەرەنتی پێنج ساڵ یاخود 100 هەزار كیلۆمەتری لەگەڵە و لە چەند رۆژی داهاتوودا مامۆستایان دەتوانن لە رێگای لقەكانی یەكێتیی مامۆستایان لە پارێزگاكان لە وەرگرتنی ئەو ئۆتۆمبێلانە سوودمەندبن.
راشیگەیاند، “ئۆتۆمبێلەكە بە نرخی 500 بۆ هەزار دۆلار كەمتر بۆ مامۆستایان دابیندەكرێت”.
