بافڵ جەلال تاڵەبانی لە کۆبوونەوەی لەگەڵ د. لەتیف جەمال رەشید رایگەیاند، هەوڵەكانمان لە پێناو بەدەستهێنانی مافە یاسایی و دەستوورییەكانمان بەردەوام دەبین و نامانەوێت ژیانی خەڵكەكەمان تێكەڵی ململانێ سیاسییەكان بكرێت.
ئەمڕۆ چوارشەممە بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا چاویکەوت بە د. لەتیف جەمال رەشید سەرۆککۆماری عێراق و لە دیدارێکدا كە رەفعەت عەبدوڵا، بڕیاردەری دەستەی کارگێڕی و سەعدی ئەحمەد پیرە، ئەندامی مەکتەبی سیاسی ئامادەیبوون، دوایین رووداو و گۆڕانكارییە سیاسییەكان گفتوگۆیان لەبارەوەكرا و جەخت لە بەردەوامیی هەوڵە نیشتمانییەكان كرایەوە لەپێناو چارەسەركردنی كێشەكانی نێوان هەرێم و بەغدا و تێپەڕاندنی ناكۆكییەكان.
لە کۆبوونەوەکەدا بافڵ جەلال تاڵەبانی ئاماژەی بە هەوڵەكانی یەكێتی كرد و رایگەیاند، “یەكێتی هێزێكی بەرپرسیارە بەرامبەر ژیان و گوزەرانی كۆمەڵانی خەڵك، بۆیە لە هەوڵەكانمان لەپێناو بەدەستهێنانی مافە یاسایی و دەستوورییەكانمان بەردەوام دەبین و نامانەوێت ژیانی خەڵكەكەمان تێكەڵی ململانێ سیاسییەكان بكرێت”.
