وەزیری تەندروستیی هەرێم ڕایگەیاند، سەرەتای مانگی داهاتوو لیژنەی تەندروستی وەزارەت و وەزارەتەکانی پەروەردە و خوێندنی باڵا کۆدەبێتەوە و بڕیار لەسەر چۆنیەتی بەردەوامیدان بە خوێندن دەدەن.
سامان بەرزنجی، وەزیری تەندروستیی هەرێم لە کۆنگرەیەکی ڕۆژنامەوانیدا ئەمڕۆ 26ی تشرینی یەکەم ڕایگەیاند، “پرۆسەی خوێندن لە هەموو دونیادا ڕوبەڕوی قەیران بۆتەوە و لە هەرێمیش بەهەمان شێوە، بۆیە ڕۆژی یەکی مانگی داهاتوو لیژنەیەک لە وەزارەتی تەندروستی لەگەڵ وەزارەتەکانی پەروەردە و خوێندنی باڵا کۆدەبێتەوە و ئەگەر توانرا مەرجەکان جێبەجێبکرێت ئەوا کار لەسەر گەڕانەوەی خوێندکاران دەکرێت بۆ پۆلەکان”.
وەزیری تەندروستیی هەرێم ڕاشیگەیاند، “ئەگەر بتوانرێت ڕێنماییەکان لە خوێندنگەکاندا جێبەجێبکرێت ئەوا باشتر دەتوانرێت کار لەسەر گەڕانەوەی خوێندکاران بکرێت، مەرجەکانیش ئەوەن کە دەبێت دوری خوێندکاران لە یەکەوە بپارێزرێت و ڕێگە لە بەریەککەوتنی خوێندکاران بگیرێت”.
ئەگەرچی لە 10ی تشرینی یەکەمەوە بڕیار لەسەر کردنەوەی دەرگای بەشێک لە قۆناغەکانی خوێندن دراوە، بەڵام بڕیارەکە وەک خۆی جێبەجێ نەکراوە، بەتایبەت لە پارێزگای سلێمانی.
