بافڵ جەلال تاڵەبانی رایگەیاند، سیاسەت و ستراتیژی نەگۆڕی یەکێتی بۆ چارەسەرکردنی کێشەکان و گەیشتن بە رێککەوتنێکی یەکجارەکی کە تێیدا مافەکانی گەلی کورد پارێزراوبێت بەردەوام دەبێت.
لە چێوەی سەردانەکەیدا بۆ بەغداد ئەمڕۆ بافڵ جەلال تاڵەبانی سەرۆکی یەکێتیی نیشتمانیی کوردستان لەگەڵ سەید عەمار حەکیم، سەرۆکی رەوتی حیکمە کۆبووەوە.
لە کۆبوونەوەکەدا پەرەپێدانی پەیوەندییەکان و فراوانکردنی هەماهەنگییەکان لەپێناو بەدیهێنانی بەرژەوەندییە باڵا و نیشتمانییەکان دووپاتکرایەوە.
هەر لە کۆبوونەوەکەدا دۆخی سیاسیی عیراق، چارەسەرکردنی کێشەکانی نێوان هەولێر و بەغدا و پابەندبوون بە هاوبەشیی راستەقینە تاوتوێ کران.
لە بەشێکی دیکەی کۆبوونەوەکەدا بافڵ جەلال تاڵەبانی رایگەیاند، “سیاسەت و ستراتیژی نەگۆڕی یەکێتی بۆ چارەسەرکردنی کێشەکان و گەیشتن بە رێککەوتنێکی یەکجارەکی کە تێیدا مافەکانی گەلی کورد پارێزراوبێت بەردەوام دەبێت، هەموو هەوڵێکیشمان لەو پێناوەدایە”.
