وەزارەتی پلاندانانی عێراق رایگەیاند راپرسییەکی ئابوری و کۆمەڵایەتی بۆ خێزانەکانی عێراق دەستپێدەکەن و سەرجەم پارێزگاکان دەگرێتەوە بە هەرێمی کوردستانیشەوە.
وەزارەتەکە لە راگەیەندراوێکدا ئاماژەی بەوەکردووە، فەرمانبەرانی دەزگای ئاماری ناوەندی سەردانی ئەو خێزانانە دەکەن کە لە سەرجەم شار و ناوچەکاندا نیشتەجێن، ئاماژە بەوە دەکات کە ئامانج لە راپرسییەکە زانینی نیشاندەرەکانی هەژاری و ئاستی ژیان و واقیعی خزمەتگوزارییەکانە.
داواشی لە خێزانەکان کردووە هاوکاری توێژەران بکەن لە پێدانی داتای دروست، بەمەبەستی داڕشتنی پلان و سیاسەت بە ئامانجی بەرەنگاربوونەوەی هەژاری و باشترکردنی خزمەتگوزارییەکان بە گشتی.
