سەرۆكی سەندیكای شۆفێران لە سلێمانی رایدەگەیەنێت، ئەو وادەیەی بۆ لێدانی لۆگۆ بە ئۆتۆمبێلی تاكسییەكان دانرابوو كۆتاییهات و ئەگەر بڕیارەكە درێژنەكرێتەوە هاتوچۆ لە رێگای مەفرەزەكانەوە دەتوانێت سزای شۆفێری ئەو تاكسییانە بدات كە پابەندی بڕیارەكە نەبوون.
ئازاد ئەحمەد سەرۆكی سەندیكای شۆفێران لە سلێمانی لە لێدوانێكدا بە تۆڕی میدیایی ئێستای راگەیاند، ئەو وادەیەی لەلایەن وەزارەتی ناوخۆی هەرێمی كوردستانەوە بۆ ئۆتۆمبێلی تاكسییەكان دانرابوو كە دەبێت لۆگۆ بدەن لە ئۆتۆمبێلەكانیان ئەمڕۆ 15ی تەمموز دوا وادەبوو و كۆتاییهات و تائێستا بڕیار نەدراوە ئەو وادەیە درێژبكرێتەوە، بەڵام بەشێك لەو شۆفێری تاكسییانە مامەڵەیان تەواونەكردووە و لۆگۆیان وەرنەگرتووە و ئەگەرێك هەیە سبەینێ جارێكی دیكە ئەو وادەیە بۆ شۆفێرانی تاكسی درێژبكرێتەوە.
سەرۆكی سەندیكای شۆفێران ئاشكراشیكرد، ئەگەر بڕیارەكە درێژنەكرێتەوە ئەوا مەفرەزەكانی هاتوچۆ دەتوانن سزای ئەو شۆفێری تاكسییانە بدەن كە پابەندی بڕیارەكە نەبوون و لۆگۆیان وەرنەگرتووە.
