دوای تێپەڕبوونی شەست ساڵ بەسەر شەهیدبوون و بەخاكسپاردنی لە كەركوك، ئەمڕۆ رووفاتی شەهید (جەلیل سوسێی) گەڕێندرایەوە بۆ سلێمانی و لە گۆڕستانی ئابڵاخ بەخاكسپێدرا.
جەلیل حەمەحەسەن ساڵی 1927 لە گوندی بیران-ی ناوچەی سورداش لە پارێزگای سلێمانی لەدایکبووە.
پێشتر هەر لە سلێمانی کارمەندی شارەوانی بووە. ساڵی 1959 پەیوەندی بە جوڵانەوەی سیاسیی کورد لەوکاتەدا کردووە، هاوڕێیەکی نزیک و کەسێکی متمانەپێکراوی سەرۆك مام جەلال و مامۆستا ئیبراهیم ئەحمەد بووە.
لە گەڕەکی ئیبراهیم پاشا لە ماڵەکەی شەهید جەلیل-دا چەندین کۆبوونەوەی نهێنیی رێکخستنەکانی ناو شار کراوە و ئامادەکاری بۆ شۆڕش کراوە.
شەهید جەلیل سەرپەرشتی هەوڵی تیرۆرکردنی زەعیم سدیق-ی لەئەستۆ بووە، کە ئەوکاتە زەعیم سدیق ئازارێکی زۆری خەڵکی ناوچەكەی دەدا. لە داستانەکانی (چیمەن، ناوچەی شوان، قەرەهەنجیر، کۆچەک و یاروەلی) بەشداربووە. دواجار هەر لە ناوچەی چیمەن لە کۆچەک و یاروەلی لە تەمەنی 36 ساڵیدا شەهید بوو، بەشێوەیەکی ئەمانەت لە شۆریجە نێژراوە و، لەسەر داواکاری خێزانەکەی گڵکۆکەی گەڕێنرایەوە شاری سلێمانی.
