وتەبێژی وەزارەتی پلاندانان، پشتڕاستی کردەوە کە رێژەی بێکاری لە عێراق بە روونی کەمیکردووە، رەنگە بۆ کەمتر لە 14%.
عەبدولزەهرە هینداوی رایگەیاند، ڕاپرسی ئابووری و کۆمەڵایەتی لە سەرجەم پارێزگارەکانی عێراق بە پارێزگارەکانی هەرێمی کوردستانیشەوە لە مانگی تەمموزی ئەمساڵدا دەستپێدەکات.
ئاماژەی بەوەشدا، “ئەو راپرسییە نیشانەی گرنگمان بۆ دابیندەکات سەبارەت بە هەژاری، هێڵی هەژاری، تەرکیزکردن و قوڵایی هەژاری، ئەمە جگە لە پێوەرەکانی دیکە سەبارەت بە بێکاری، چڕبوونەوە و رێژەکەی لە پارێزگاکان، جگە لە پێوەرەکانی دیکە سەبارەت بە تەندروستی، پەروەردە، نیشتەجێبوون، داهات و خەرجییەکانی خێزانی عێراقی”.
هنداوی ئاماژەی بەوەش کرد کە “راپرسیی ئابوری گرنگە بۆ کۆکردنەوەی داتاکان بۆ پلانی پێنج ساڵی داهاتووی وەزارەتی پلاندانان”.
