ئەمڕۆ ئەنجومەنی شارەوانیی سلێمانی كۆبووەوە و تاوتوێی چەند بڕیارێكی دەركرد و چەند بابەتێكی دیكە گفتوگۆیان لەسەر كرا و یەكێك لەو بابەتانە پاراستنی شوێنەوار و كەلەپووری ئەو 8 گەڕەكەی كە دەكەونە ناوەندی شار و پاراستنی سیماكانیانەوە.
بەپێی راگەیەندراوێكی سەرۆكایەتیی شارەوانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەنجومەنی شارەوانیی سلێمانی كۆبوونەوەی ئاسایی خۆی سازدا و 5 بڕیار واژووكران كە رێكارە یاسایی و هونەرییەكانی بڕیبوو و چەندین مامەڵەی هاوڵاتییان تاووتوێكراون بڕیاری پێویستیان لە بارەوەدرا، بەپێی یاسا و رێنماییەكانیش دوو تەوەری گرنگ گفتوگۆیان لەسەركرا لەوانە:-
1. پلانی بەرەوپێشبردن و گەشەپێدانی سێكتەری گەشتیاریی لەشاری سلێمانی و زیاتر خزمەتكردن بە شوێنە گەشتیارییەكان و دروستكردنی ناوچەی گەشتیاریی و گرنگیدان بەو سیكتەرە و هێنانی گەشتیاری زیاتر و بوژاندنەوەی زیاتری كەرتی ئابوریی و ڕەخساندنی هەلی كاری زیاتر بۆ گەنجان.
2. بە ئامادەبوونی بەڕێوەبەری گشتیی شوێنەواری سلێمانی و ئەندازیارانی شارەوانی تیشكخرایە سەر پاراستنی شوێنەوار و كەلەپووری ئەو 8 گەڕەكەی كە دەكەونە ناوەندی شار و پاراستنی سیما و بەكارهێنانیان بەپێی یاسای ژمارە 5 ساڵی 2021، هەروەها فەرمانی وەزارەتی شارەوانیی و گەشتوگوزار كە ناوەندی شار بپارێزرێت لە تێكچوون و گۆڕانكاریی و دوای گفتوگۆیەكی چڕ ئەنجومەنی شارەوانیی بڕیاریدا بە پێكهێنانی لیژنەیەك لە لایەنە پەیوەندیدارەكان بۆ ئەو مەبەستە.
