توێژینەوەیەکی نوێ دەریخستووە، نەشۆردنی ددانەکانت پێش خەوتن ئەگەری تووشبوونت بە نەخۆشییەکانی دڵ و خوێنبەرەکان زیاد دەکات.
زاناکان لێکۆڵینەوەیان لە هەزار و 675 نەخۆش کردووە کە تەمەنیان 20 ساڵ و سەرووترە و لە نێوان مانگی نیسانی 2013 تا ئازاری 2016 سەردانی نەخۆشخانەی زانکۆی ئۆساکایان کردووە لە ژاپۆن بۆ پشکنین، نەشتەرگەری یان چارەسەر.
ئەوان بە پشتبەستن بە خووەکانی پاکوخاوێنی دەم و ددانیان بەسەر چوار گروپدا دابەشکران، هەروەها تەمەن، رەگەز، مێژووی جگەرەکێشان، تۆماری ددان و پزیشکی هەڵسەنگێندرا.
توێژەران بۆیاندەرکەوتووە ئەو کەسانەی شەوانە ددانیان دەشۆن ئەگەری تووشبوونیان بە نەخۆشییەکانی دڵ کەمترە .
نووسەرانی توێژینەوەکە دەڵێن، “ئەنجامەکان بە ڕوونی ئاماژە بەوە دەکەن کە شتنی ددان تەنها لە بەیانیاندا دوای لە خەو هەڵسان بەس نییە و ددان شتن لە شەودا باشە بۆ پاراستنی تەندروستییەکی باش”.
ئاماژەیان بەوەشکردووە، بۆ خۆپاراستن لە نەخۆشییەکانی دڵ و خوێنبەرەکان زۆر گرنگە پێش نانی بەیانی ددانەکانت بشۆیت، بەڵام لەوەش گرنگتر شەوانە پێش خەوتن ددانەکانت بشۆیت.
توێژەران پێیانوایە بەکتریاکانی دەم و ددان بەرپرسن لە هەوکردن لە هەموو لەشدا کە دەبێتە هۆی کێشەی تەندروستیی جددی وەک نەخۆشییەکانی دڵ و خوێنبەرەکان.
