بافڵ جەلال تاڵەبانی سەرۆكی یەكێتیی نیشتمانیی كوردستان پەیامێكی بەبۆنەی هاتنەوەی جەژنی قوربانەوە بڵاوكردەوە كە جەژنی قوربانی پیرۆز لە موسڵمانانی كوردستان، عێراق و جیهان پیرۆزدەكات”.
هەر لە پەیامەكەی سەرۆك بافڵدا هاتووە، هیوادارم ئەم جەژنە پیرۆزە ئاشتی و كامەرانی لەگەڵ خۆیدا بهێنێت و سەرەتایەك بێت بۆ كۆتاییهاتنی ناكۆكییەكان و دەستپێكی قۆناغێكی نوێی تەبایی و برایەتی بێت، پێكەوە لەچوارچێوەی كوردستانێكی فرەڕەنگ و دەوڵەمەند بە یەكترقبووڵكردن و رێزگرتن لەجیاوازییەكان، ژیانێكی ئارام و دوور لە توندوتیژی و توندڕەوی بەسەربەرین.
سەرۆكی یەكێتی راشیدەگەیەنێت، “نابێت رێگەبدەین بیری توندڕەویی جێگەی میانڕەوی بگرێتەوە و پێویستە كەلتووری خۆشەویستی و ژیاندۆستی بەسەر كۆمەڵگەكەماندا زاڵبكەین، لە رووە سیاسییەكەشەوە جەژن بكەینە بنەمایەك بۆ تێپەڕاندنی ئاڵنگارییەكان و مژدەی یەكڕیزییەكی هەمیشەیی لە ناوخۆ و دەرەوە بە خەڵكە خۆشەویستەكەمان بدەین، كە ئەمەش تەنها رێگەیە بۆ بەهێزتركردنی كوردستانەكەمان و پارێزگاریكردن لە بەرژەوەندییە نیشتمانی و نەتەوەییەكان”.
