بەڕێوەبەرایەتیی ئاسایشی رۆژئاوای سلێمانی رایگەیاند، بکوژی هاوڵاتی خواناس وریا-یان لە سنووری چەمچەماڵ دەستگیرکردووە و بنەماڵەی کوژراوەکەش لە روونکردنەوەیەکدا دەڵێن، دۆسییەکەمان داوەتە دەست یاسا.
لە راگەیەندراوی ئاسایشی سلێمانیدا هاتووە، “ئێوارەی رۆژی پێنج شەممە لەناو بازاڕی قەزای چەمچەماڵ کەسێک بەناوی ( خواناس وریا نازم گلی )، لەلایەن ماتۆڕسوارێکەوە تەقەی لێدەکرێت و دەکوژرێت و دواتر تەقەکەرەکە هەڵدێت”.
رایگەیاندووە، دوای بەدواداچوون توانرا شوێنی مانەوەی تۆمەتبارەکە دیاریبکرێت و دوای 24 کاتژمێر تۆمەتبارەکە دەستگیرکرا.
تۆمەتبارەکە ناوی ( ه ، ک ، ح ) لەدایکبووی 1995ـە و دانیشتووی چەمچەماڵە.
ئاسایشی سلێمانی دەڵێت، تۆمەتبار هۆکاری کوشتنەکەی بۆ جیاوازیی بیروڕای ئاینی گەڕاندەوە، دانیناوە بەوەی کە چەندجارێک گفتوگۆیان کردووە و لێکتێنەگەیشتن روویداوە .
لە ئێستادا تۆمەتبار بە ماددەی 406 بە بڕیاری دادوەری لێکۆڵینەوە راگیراوە و لێکۆڵینەوە لەگەڵی بەردەوامە.
لە بارەی تاوانەکەوە بنەماڵەی خواناس وریا روونکردنەوەیەکیان بڵاوکردەوە و تێیدا جەختدەکەنەوە کە دوژمنایەتی و کێشەی کۆمەڵایەتییان لەگەڵ هیچ کەسێک و ئەو کەسەشدا نییە کە کوڕەکەیانی کوشتووە.
بنەماڵەی کوژراوەکە دەڵێن “ئێستا دۆسییەکە لای یاسایە و ئێمە داومانەتە دەست یاسا مافمان بۆ بگەرێنێتەوە”.
