دەزگای ئاسایشی هەرێم دەستبەسەرداگرتنی بڕێكی زۆر ماددەی هۆشبەر و سەدان كارتی بانكی رادەگەیەنێت.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، بەڕێوەبەرایەتیی ئاسایشی فڕۆكەخانەی نێودەوڵەتیی سلێمانی، رێگری لە هەوڵی بردنەدەرەوەی بڕێكی زۆر لە ماددەی هۆشبەر و سەدان كارتی بانكی دەكات.
لە چوارچێوەی چالاكییەكانی بەڕێوەبەرایەتیی ئاسایشی فڕۆكەخانەی نێودەوڵەتیی سلێمانی، لە پێناو چەسپاندنی یاسا و ڕێگریكردن لە هەر جۆرە كارێكی نایاسایی توانرا ڕێگری بكرێت لە:-
-بردنەدەرەوەی سەدان ( كارت بانكی ئەلیكترۆنی) بە شێوازی شاراوە لە لاپتۆپ و پاوەربانك و خواردەمەنی شاردرابوونەوە، ئەمەش پێچەوانەی یاسا و ڕێنماییەكانی بانكی مەركەزیی عێراقی یە.
– دەستبەسەرداگرتنی هەندێك ماددەی پزیشكی كە ڕەزامەندیی بەڕێوەبەرایەتیی تەندروستی نەبووە.
– دەستگیركردنی دوو تۆمەتباری بازرگانی ماددەی هۆشبەر و دەستگرتن بەسەر بڕی 7 كیلۆ و 170 گرام ماددەی هۆشبەر لە جۆری ( حەشیش ) كە بەشێوازی شاراوەیی ئامانجیان بووە بیبەنە دەرەوەی هەرێمی كوردستان.
تۆمەتباران:( پ ، أ ، ع ) و ( پ ، ڕ ، د ) لە ئێستادا بە ماددەی 25 لە یاسای بەرەنگاربوونەوەی ماددە هۆشبەرەكان و كارتێكەرە ئەقڵییەكان ڕاگیراون و لێكۆڵینەوە لە دۆسیەكانیان بەردەوامە.
