وەزارەتی ناوخۆ هۆشداری بەو کەسانە دەدات کە چەکی بێمۆڵەتیان هەیە و داوایان لێدەکات تا 21 ی تەمموز تۆماری بکەن.
وەزارەتی ناوخۆی هەرێم لە راگەیەندراوێکدا بڵاویکردەوە، “ئەو کەسانەی چەکی بێمۆڵەتیان هەیە تا بەرواری 21ی تەمموزی 2023 چەکەکانتان تۆمار بکەن بۆ ئەوەی دوای ئەو رێکەوتە، رووبەرووی لێپرسینەوەی یاسایی توند نەبنەوە”.
ئاماژەی بەوەشکردووە، “بەپێی بڕگەی یەکەم لە ماددەی 15 لە یاسای چەک، هەر کەسێک بەبێ مۆڵەتی دەسەڵاتی مۆڵەتدان، دەستکاریی چەکێکی ئاگرین یان تفاقی بکات، هەڵیبگرێت، بیفرۆشێت، چاکیبکاتەوە یان دەستاودەستی پێوە بکات، ئەوا بەبەندکردن بۆ ماوەیەک کە لە یەک ساڵ کەمتر نەبێت و لە سێ ساڵ زیاتر نەبێت، بە پێبژاردنێک کە لە دوو ملیۆن دینارکەمتر نەبێت و لە پێنج ملیۆن دینار زیاتر نەبێت، سزا دەدرێت”.
