وەزیری خوێندنی باڵا دوای بەسەركردنەوەی هۆڵی تاقیكردنەوەكانی توانستی زانستی رایدەگەیەنێت، هەر کەسێک کەمتەرخەمى یان دەستتێوەردانى ناڕەوا لە پرۆسەکەدا بکات رووبەڕووى سزاى کارگێرى و یاسایى دەکەینەوە.
ئارام محەمەد قادر، وەزیرى خوێندنى باڵا و توێژینەوەى زانستى لە زانکۆى چەرموو لە چەمچەماڵ هۆڵى تاقیکردنەوەکانى توانستى زانستى دبلۆمی باڵا، ماستەر و دکتۆراى بەسەرکردەوە رایگەیاند، لە چواردە زانکۆى کوردستان 15 هەزار و 728 خوێندکار بەشدارییان لە تاقیکردنەوەکاندا كردووە.
دڵنیاییشی بە دەرچووان دا “هەر کەسێک کەمتەرخەمى یان دەستتێوەردانى ناڕەوا لە پرۆسەکە بکات رووبەڕووى سزاى کارگێرى و یاسایى دەکەینەوە”.
وه‌زیری خوێندنی باڵا ئەوەشی خستەڕوو، كاریان بۆ ئەوە كردووە سێكوچکەى (شه‌فافیه‌ت، رەخساندنی هەلی یەکسان و دادپەروەری) له پرۆسه‌ی خوێندنی باڵا/ دبلۆمى باڵا و ماسته‌ر و دكتۆرا له زانكۆكانی كوردستان ره‌نگ بداته‌وە و مافی هیچ پێشكه‌شكارێك نه‌فەوتێت، بەشێوەیەک پڕۆسه‌كه دوور بێت له هه‌موو ده‌ستێوه‌ردانێك.
دوپاتیشیکردەوە، دواى پرۆسەى تاقیکردنەوەکان، پڕۆسەى سیستمى خاڵبەندى و رێکخستنی پێشبڕکێ لە نێوان پێشکەشکاران لە رێگەى لیژنەیەکى تایبەت لە زانکۆکان ئەنجامدەدرێت و، دوای تەواوبوونی پرۆسەکەش ئەنجامە بەراییەکان لەلایەن وەزارەتی خوێندنی باڵاوە پەسەنددەکرێت و لەگەڵ داتای سەرجەم پیشکەشکاراندا رادەگەیەنرێت ئەمەش لەپێناو هەبوونى بنەماى شەفافیەت لە پڕۆسەى پێشبرکێ، پاشان دەرگاى سکاڵا و تانەگرتن دەکرێتەوە و هەموو سکاڵاکان بەهەند وەردەگیرێن.
لەو 15 هەزار و 728 پێشكەشكارەی داواكارییان بۆ خوێندنى باڵا لە زانکۆکانى کوردستان پێشکەش کردووە، 11 هەزار و 382 بۆ خوێندنی ماستەر، دوو هەزار و 692 بۆ دكتۆرا، 177 بۆ دبلۆمی باڵای دوو ساڵەی پزیشكی و هەزار و 477 بۆ دبلۆمى باڵاى یەک ساڵەى ئەکادیمى داواكارییان پێشكەشكردووە و ئەمڕۆ بەشدارى تاقیکردنەوەکانیان کرد.
