بەڕێوەبەری چاودێری و بازرگانیی سلێمانی رایدەگەیەنێت، نرخی مریشك لە بازاڕدا بەرزبوونەوەی بەخۆوە بینیوە و نرخی یەك كیلۆ مریشك گەیشتووەتە سێ هەزار دینار.
سۆران عەبدولغەفور بەڕێوەبەری چاودێری و بازرگانیی سلێمانی لە لێدوانێكدا بە تۆڕی میدیایی ئێستای راگەیاند، ماوەی چەند رۆژێكە نرخی مریشك لە بازاڕدا بەرزبوونەوەی بەخۆوە بینیوە و نرخی یەك كیلۆ مریشك گەیشتووەتە 3 هەزار دینار لەكاتێكدا هەفتەی رابردوو یەك كیلۆ مریشك بە دوو هەزار و 500 بۆ دوو هەزار و 600 دیناربووە.
بە بڕوای بەڕێوەبەری چاودێری و بازرگانیی سلێمانی ناتوانرێت نرخی مریشك هاوشێوەی گۆشتی سوور جێگیربكرێت و لە ماوەی رابردووشدا كە نرخەكەی دابەزینی بەخۆوە بینی خاوەنی كێڵگە پەلەوەرییەكان زۆر زەرەرمەندبوون.
