پۆلیسی راپەڕین دوای تێپەڕینی کوشتنی گەنجێک لە قەڵادزێ، دوو تۆمەتباری تاوانەکەیان دەستگیرکرد کە هەردووکیان هاوڕێی کوژراوەکەن.
لە راگەیەندراوی پۆلیسی راپەڕیندا ئاماژە بۆ ئەوە کراوە، لە شەوی 4/6/2023 بریندارێک بەناوی ( و . ٲ . م ) رەگەزی نێر، لەدایکبووی ساڵی 2002، پیشەی کاسب، دانیشتووی قەڵادزێ گەڕەکی راپەڕین گەیەندرایە نەخۆشخانە و بەهۆی سەختیی برینەکەیەوە بەڕێکرا بۆ نەخۆشخانەی فریاکەوتنی سلێمانی، بەڵام بەر لە گەیشتنی گیانیلەدەستدا.
دوای تێپەڕبوونی چەند رۆژێک بەسەر رووداوەکەدا، دوو هاوڕێی خۆی بە تۆمەتی کوشتنی ئەو گەنجە لەلایەن ئاسایشی قەزای ماوەتەوە دەستگیرکران.
دوای ئەوەی لێکۆڵینەوە لەگەڵ تۆمەتبارەکاندا کراوە، دانیان ناوە بە تاوانەکەیاندا، ئێستا بەپێی ماددەی 405 له یاسایی سزادانی عیراقی هەردووکیان راگیراون، لێکۆڵینەوەش لەگەڵیاندا بەردەوامە.
