وەزیری خوێندنی باڵای هەرێم رایدەگەیەنێت، “بۆ ساڵی نوێی خوێندن زۆرترین دەرفەتی خوێندنی گشتی لە زانكۆكان دەڕەخسێنین”.
بەپێی راگەیەندراوێكی وەزارەتی خوێندنی باڵای هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، لە كۆبوونەوەیەكدا بە سەرپەرشتیی وەزیری خوێندنی باڵا و توێژینەوەی زانستی، شێواز و پلانەكانی وەرگرتن و گواستنەوەو دابەزینی خوێندكاران/ قوتابیان لە زانكۆ و پەیمانگە حكومییەكانی هەرێمی كوردستان بۆ ساڵی نوێی خوێندن تاوتوێكران.
لە راگەیەندراوەكەدا هاتووە، لە سەرەتادا وەزیری خوێندنی باڵا هیوای سەركەوتنی بۆ سەرجەم قوتابیان و خوێندكارانی قۆناغی دوانزەی ئامادەیی خواست كە لە ئێستادا لە نێو پڕۆسەی تاقیكردنەوەدان، دواتر باسێكی لەبارەی سیاسەت و كارنامەی وەزارەت و دامەزراوەكانی خوێندنی باڵا بەشێوەیەكی گشتی پێشكەشكرد و دووپاتیكردەوە ئامانج لەم كۆبوونەوەیە دانانی میكانیزم و پلانی وەرگرتنە بۆ ساڵی نوێی خوێندن، بە شێوەیەك هاوتەریب بێت بۆ سوودی دەرچووان و پێداویستییەكانی بازاڕی كار، بۆ ئەمەش وتی، “بۆ یەكەمجار لە مێژووی خوێندنی باڵا لە هەرێمی كوردستان لەماوەی ساڵانی ڕابردوو، توانیمان زۆرترین ڕێژەی پلانی وەرگرتن بۆ دەرچووانی دوانزەی ئامادەیی لە زانكۆ و پەیمانگەكان تەرخانبكەین و هەلی گونجاوی خوێندن لە زانكۆ حكومییەكان بۆ دەرچووان بڕەخسێنین و لانیكەم ڕەنگدانەوەی دادپەروەری و شەفافییەت و یەكسانی بێت لە نێوان كوڕان و كچانی هەرێمەكەمان.
دووپاتیشیكردەوە، وەزارەتی خوێندنی باڵا بە رەچاوكردنی كواڵێتیی خوێندن و لە چوارچێوەی جێبەجێكردنی پلانێكی تۆكمە، كار بۆ وەرگرتنی خوێندكاران و قوتابیانی لە زانكۆ و پەیمانگەكان دەكات، بۆ ئەمەش بە زانكۆكانی راگەیاند، بە هەمان رۆحییەتی ساڵانی پێشوو و بەڕەچاوكردنی كواڵێتیی خوێندن، زۆرترین دەرفەتی خوێندن بۆ دەرچووانی ئامادەیی لە زانكۆ و پەیمانگە حكومییەكانی هەرێمی كوردستان دەرەخسێنین، لەو چوارچێوەیەشدا وەزارەت هاوكار و پاڵپشتیی زانكۆكان دەبێت.
