سیان لە یاریزانە گەورە و گرنگەکانی یانەی ڕیاڵ مەدرید نزیکن ڕوو لە یانەی دیکە بکەن، بۆ ئەو مەبەستەش ئیدارەی شاهانە ئامادەکاری دەکات.
ڕۆژنامەی “ئەی ئێس” و پۆرتاڵی “دیاریۆ سپۆرت” ئاشکرایانکردووە، لە چەند کاتژمێری ڕابردوودا جموجۆڵی بەهێز لەناوخۆی ڕیاڵ مەدرید ڕوویداوە، ئاسینسیۆ ڕیککەوتنی لەگەڵ پاریس سان جێرمان کردووە، هەروەها یانەکانی سعوودیە و قەتەر گرێبەستی خەیاڵییان خستووەتە بەردەستی کەریم بنزیمە و لوکا مۆدریچ، دووانەی ناوبراو تاوتوێی گرێبەستەکان دەکەن و ئەگەر هەیە بڕیاری چاوەڕواننەکراو بدەن.
لە بەرامبەر ئەو زانیارییانەدا ڕۆژنامەی “مارکا” نووسیویەتی، بەڕێوەبەرانی “لۆاس بلانکۆس” نزیکبوونەتەوە لە کڕینی خوسێلۆ-ی هێرشبەری یانەی ئیسپانیۆل.
جموجۆڵەکان لێرەشدا کۆتایی نەهاتووە، بەڵکو هەوڵی ئەوە دەدەن یەکێک لە هاری کەین، یان ڤیکتۆر ئۆسیمین، لاوتارۆ مارتینێز، ڕۆبێرتۆ فێرمینۆ، کای هاڤێرتز وەک جێگرەوەی کەریم بنزیمە تەرخانبکەن.
