بەرپرسێکی وەزارەتی نەوتی عێراق ئاشکرایکرد، کۆمپانیای لوک ئۆیڵی روسی بەرهەمهێنانی نەوت لە عێراق بۆ 480 هەزار بەرمیل لە رۆژێکدا بەرزدەکاتەوە.
ئەو بەرپرسە عێراقییە بە ئاژانسی رۆیتەرزی وتووە، کۆمپانیای لوک ئۆیلی روسی بەرهەمهێنانی نەوتی لە کێڵگەی رۆژئاوای قورنەی دوو لە باشووری عێراق بە بڕی 80 هەزار بەرمیل لە رۆژێکدا بۆ 480 هەزار بەرمیل لە رۆژێکدا زیادکردووە.
کۆمپانیای لوک ئۆیڵ کێڵگەی نەوتی ڕۆژئاوای قورنەی دوو بەڕێوەدەبات کە 65 کم لە باکووری رۆژئاوای پارێزگای بەسرە دوورە، یەکێکە لە گەورەترین کێڵگە نەوتییەکانی جیهان و کۆمپانیاکە دەڵێت، یەدەگی نەوتەکەی نزیکەی ١٤ ملیار بەرمیلە.
