بەڕێوەبەرایەتیی گشتیی کارەبای سلێمانی رایگەیاند، تا ئێستا هیچ پلانێکیان پێنەگەیشتووە سەبارەت بە چۆنێتیی کارەبای نێستمانی لە وەرزی هاویندا، بەڵام بە دڵنیایی کەمدەبێتەوە.
سیروان محەمەد وتەبێژی بەڕێوەبەرایەتیی گشتیی کارەبای سلێمانی بە تۆڕی میدیایی ئێستای راگەیاند، لە وەزارەتەوە پێیانڕاگەیەندراوە هەر کەموکوڕی و کێشەیەک هەیە چارەسەربکرێت، بۆئەوەی لە وەرزی گەرمادا هاوڵاتییان تووشی کێشە نەبن.
باسی لەوەکرد کە هیچ پلانێکیان پێنەگەیشتووە لە وەزارەتی کارەباوە سەبارەت بە کاتژمێرەکانی کارەبا و بەرهەمهێنان و چۆنێتیی کارەبا لە وەرزی گەرمادا، بەڵام بەهۆی بەرزبوونەوەی خواستەوە کاتژمێرەکانی کارەبا کەمدەبنەوە.
وتیشی، بەپێی ئەوەی خواست لەسەر کارەبا و کاتژمێرەکانی پێدانی کارەبای نیشتمانیی پێچەوانی یەکترن بۆیە کە وەرزی گەرما دەستپێدەکات خواست لەسەر کارەبا زیاتر دەبێت و کاتژمێرەکانی کارەبای نیشتمانی کەمدەبنەوە، بەڵام ئێستا کە خواست کەمە لەسەری لە 24 کاتژمێردا 21 بۆ 22 کاتژمێر کارەبا دەدرێت بە هاوڵاتییان.
