بزووتنەوەی گۆڕان رایدەگەیەنێت، بۆ رێگەگرتن لە بەردەوامى ئەم دۆخە و لێکترازانى زیاتر، رێگەنەدان بە پێشێلکردنى یاسا و بنەماکانى سازانى نیشتمانى هیچ کۆبونەوەیەکى کۆمسیۆن بەپێویست نازانن.
ئەمڕۆ شەممە بزووتنەوەی گۆڕان لە راگەیەندراوێکدا بڵاویکردەوە، “پاش چەندین هەوڵى بزووتنەوەى گۆڕان بۆ هێورکردنەوەى دۆخى سیاسی هەرێمى کوردستان و چارەسەرى ناکۆکییەکان لە رێگەى دامەزراوە فەرمیەکانەوە، جارێکى دیکە پرسى کاراکردنەوەى کۆمسیۆنى باڵاى سەربەخۆى هەڵبژاردن و راپرسى کوردستان لێکترازانێکى ترى دروستکرد”.
ئاماژەی بەوەشکرد، “بزوتنەوەى گۆڕان لە 31ی ئازاری 2021دا پڕۆژەیەکى بۆ هەموارى یاسای هەڵبژاردنى پەرلەمانى کوردستان پێشکەشکرد و داواى کاراکردنەوەى کۆمسیۆنى کرد لە پێناوى هەڵبژاردنێکى پاک و بێگەرد لەکاتى یاسایی خۆیدا، بەڵام بۆ ئەم پرسە هیچ هەنگاوێکى پراکتیکى نەنرا، دواجار پێنج لایەنى سەرەکى لە 11 ی ئازاری 2023 رێکەوتنێکیان ئیمزاکرد، کە ئەم دوو پرسە رەهەندى نیشتمانییان هەیە و پێویستە بە سازان و هاوتەریب هەموار و کارا بکرێنەوە”.
هەر لە راگەیەندراوەکەدا هاتووە، “بزوتنەوەى گۆڕان سیاسەتى سەربەخۆى خۆى هەیە، کە پێداگرییە لە بنەما یاساییەکان و گەڕانەوەى شکۆ بۆ دامەزراوەکان، بۆ رێگەگرتن لە بەردەوامى ئەم دۆخە و لێکترازانى زیاتر، هەروەها رێگەنەدان بە پێشێلکردنى یاسا و بنەماکانى سازانى نیشتمانى هیچ کۆبونەوەیەکى کۆمسیۆن بەپێویست نازانین”.
لە کۆتایی راگەیەندراوەکەشدا جەختلەوەکراوەتەوە، “وەکو ئەرکى نیشتمانى و سیاسی لە پێناو دۆزینەوەی دەرچەیەك بۆ چارەسەری ناکۆکیەکانى هەرێم و پێشهاتە نوێیەكانی گۆڕەپانی سیاسی عێراق و دوورخستنەوەی مەترسی لەسەر گوزەرانی خەڵك و پاراستنى قەوارەى هەرێم، بزووتنەوەى گۆڕان داوای کۆبونەوەى لوتکەى پارتە سیاسییە سەرەکیەکان دەکات”.
