بە ڤیدیۆ.. سەرۆكی دەستەی ئەركانی ھێزەكانی 70 و بەڕێوەبەری دژەتیرۆر لیوای 711 یان بەسەركردەوە

سەرۆكی دەستەی ئەركانی ھێزەكانی 70 بە یاوەریی بەڕێوەبەری گشتیی دەزگای دژەتیرۆر سەردانی لیوای 711 ی ھێزەكانی 70 دەكات.

ئەمڕۆ 23 ی ئایاری 2023 ، لیوا ركن عومەر ساڵح حەسەن سەرۆكی دەستەی ئەركانی ھێزەكانی 70 و وەھاب ھەڵەبجەیی بەڕێوەبەری گشتیی دژەتیرۆر ولیوا ركن ڕێبوار محێدین محەمەد فەرماندەی فیرقەی دوو ھێزەكانی پێشمەرگە و ژمارەیەك لە ئەفسەرانی پلە باڵای ھێزەكانی 70 سەردانی لیوای 711 ی ھێزەكانی 70 یان كرد و لەلایەن عەمید محەمەد مەجید مەلا سەعید قەیتوولی فەرماندەی لیوای 711 و ئەفسەران و پێشمەرگەكانی لیوای ناوبراو بە گەرمی پێشوازیان لێكرا.

مەبەست لەم سەردانە ئاگاداربوونە لە رەوشی ھێزەكانی پێشمەرگە و چۆنێتی بەڕێوەچوونی ئەركەكانیان و توند و تۆڵكردنی سەنگەرەكانیان، خۆئامادەكردنیش بۆ پڕۆسەی یەكخستەنەوە و ڕێكخستەنەوەی ھێزەكانی پێشمەرگە.

ھەر لەو سەردانەدا سەرۆكی دەستەی ئەركانی ھێزەكانی 70 باسی لەدوایین بەرەو پێشچوونەكانی پڕۆسەی چاكسازی كرد و تیشكی خستە سەر ئامانجەكانی ئەو پرۆِسەیە، داواشی لە فەرماندە و ئەفسەران و پێشمەرگەكانی لیوای 711 ی ھێزەكانی 70 ی كرد كە ئامادە سازبن بۆ ھەر فەرمان و ئەركێك پەیوەست بە پڕۆسەی چاكسازی كە پێیان بسپێردرێت.

لای خۆیانەوە فەرماندەو ئەفسەران و پێشمەرگانی لیوای 711 خۆشحاڵی خۆیان بۆ ئەو سەردانە و بەسەركردنەوەیە دەربڕی، ھەروەھا پابەندبوونی خۆیانیان دووپاتكردەوە بۆ ھەر فەرمانێك كەپێیان بدرێت لەپێناو بەرژەوەندیی ھێزی پێشمەرگە و گەل و خاكی كوردستان بێت.

 

 

 

 

 

 

 

 

 

بابەتی پێشتر

بە بڕیاری دادوەر بەڕێوەبەری كارەبای چوارتا دەستگیركرا

بابەتی دواتر

كارەبای چەند شوێنێك لە سلێمانی بڕدرا

بابەتی پەیوەندیدار
Total
0
Share