پۆلیسی سلێمانی دەستگیرکردنی دوو کەسی راگەیاند کە تۆمەتبارن بە فرۆشتنی ئەندامەکانی جەستەی مرۆڤ.
بەڕێوەبەرایەتیی پۆلیسی سلێمانی بڵاویکردەوە، “دوای ئەوەی زانیاری گەیشتە دەست هێزەكانی پۆلیس كە دوو تۆمەتبار بازرگانی بە جەستەی مرۆڤەوە دەكەن و كڕین و فرۆشتن بە گورچیلەی مرۆڤەوە دەكەن، هێزەكانی پۆلیس لێكۆڵینەوە و بەدواداچوونەكانیان دەستپێكرد و دوای وەرگرتنی بڕیاری دادوەر توانرا لەلایەن بنكەی پۆلیسی سەرا و بەهاوكاری بنكەی پۆلیسی ئازادی دوو تۆمەتبار دەستگیربكرێن”.
ئاماژەی بەوەش کرد، “هەردوو دەستگیرکراوەکە بە ناوەکانی س،ب،ع لەدایكبووی 1986 دانیشتووی شاری هەولێر، ز،خ،ت لەدایكبووی 1988 دانیشتووی شاری بەغدا، گورچیلەیەکیان بە 23 ملیۆن دینار فرۆشتووە”.
ئاشکراشیکرد، “هەردوو تۆمەتبار لە ئێستادا راگیراون و لێکۆڵینەوە لەگەڵیاندا بەردەوامە”.
