كونسوڵ و نوێنەرانی 12 وڵات داوادەكەن هەموو هەنگاوێکی پێویست بگیرێتەبەر لەپێناو ئەنجامدانی هەڵبژاردن بەبێ دواخستن.
کونسوڵخانە گشتییەکان و نوێنەرایەتییە دیپلۆماسییەکانی بەریتانیا، ئەمریکا، ئەڵمانیا، هۆڵەندا، کەنەدا، یەكێتیی ئەوروپا، فەرەنسا، چیک، یۆنان، ئیتاڵیا، بولگاریا، پۆڵەندا و رۆمانیا لە راگەیەندراوێکی هاوبەشدا، دەستخۆشی لە حکومەتی هەرێم، پەرلەمان و خەڵکی هەرێمی كوردستان دەكەن لە بەرامبەر “پابەندبوونی بەردەوامیان بە بنەما و بەها دیموکراسییەکان و پێشوازیکردن لە رۆحی نوێبوونەوەی هاوکاری نێوان لایەنەکان”.
هەروەك داواش لە پەرلەمان و حکومەتی هەرێمی کوردستان دەکەن هەموو هەنگاوێکی پێویست بگرێنەبەر لەپێناو ئەنجامدانی هەڵبژاردن بەبێ دواخستن.
نوێنەرایەتییە دیپلۆماسییەكان لە بەشێكی دیكەی راگەیەندراوە هاوبەشەكەیاندا جەخت لەسەر گرنگیی هەڵبژاردنێکی ئازاد و دادپەروەرانە دەکەنەوە و داوا لە هەموو لایەنە پەیوندیدارەکان و لایەنە سیاسییەکان و سەرجەم لایەنە پەیوەندیدارەکانی دیکەی هەرێمی کوردستان دەکەن بەشێوەیەکی هاوبەش کاربکەن بۆ تێپەڕاندنی ئەو ئاستەنگانەی ماون لە بەردەم پرۆسەی هەڵبژاردن.
بەمەبەستی زامنكردنی “ئەنجامدانی هەڵبژاردنێک کە پابەندبێت بە پێوەرە نێودەوڵەتییەکان و مافەکانی هەموو هاوڵاتییان بپارێزێت، لەوانەش ژنان و پێکهاتەکان بۆ بەشداریکردن لە پرۆسەی دیموکراسیدا”، وەك ئەوەی نوێنەرایەتییەكان دووپاتیدەكەنەوە.
