سەمیر هەورامی وتەبێژی قوباد تاڵەبانی جێگری سەرۆك وەزیران رایدەگەیەنێت، “پڕۆژەی رێكخستنەوەی دارایی گشتی لە هەرێمی كوردستان، كە ئەمڕۆ پەسەندكرا لە كۆبوونەوەی ئەنجومەنی وەزیراندا، پڕۆژەی هەموو لایەنەكانی حكومەت بووە و بە كۆی دەنگی سەرۆك و جێگری سەرۆك وەزیران و هەموو ئەندامانی ئەنجومەن پەسەندكراوە”.
سەبارەت بەوەی گوایە هەندێك لایەن لە دژی بوون، سەمیر هەورامی ئەو دەنگۆیانەی رەتكردەوە و وتی، “گفتۆگۆی ورد لەبارەی چۆنییەتی دارشتنی پڕۆژەكەوە كرا، ئەگەرنا هەموو لایەنەكانی پێكهێنەری حكومەت، لەگەڵ ناوەڕۆك و ئامانجی ئەو پڕۆژەیە بوون و بەهیچ شێوەیەك رەتنەكراوەتەوە”.
وتەبێژی جێگری سەرۆك وەزیران جەختیشیكردەوە، “هیچ كەسێك دژی نەبووە و هەمووان لەگەڵ ئەو مەبدەئە بوون كە پێویستە بۆ رێكخستنەوەی دارایی هەرێم، داهات و خەرجییەكان ناوەندی بن و مووچە سیادی بێت”.
