سندوقی دراوی نێودەوڵەتی رایگەیاند، عێراق لە ساڵی 2022دا بە بەهای 105 ملیار دۆلار کاڵا و شمەکی هاوردە کردووە.
سندوقی دراوی نێودەوڵەتی لە ریزبەندییەکیدا ئاماژەی بەوەکردووە کە “عێراق لە ساڵی 2022دا کەلوپەل و خزمەتگوزاریی بە بڕی 105.4 ملیار دۆلار هاوردەکردووە”.
رایگەیاندووە، “ئەو بڕە هاوردەکراوە بەراورد بە ساڵانی 2020 و 2021 زیادی کردووە، کە 60 و 72.8 ملیار دۆلار بووە لەو ساڵانەدا”.
سندوقەکە پێشبینی کردووە “بەهای هاوردەکردن لە عێراق بۆ کاڵا و خزمەتگوزارییەکان بۆ ساڵی 2023 وەک خۆی بمێنێتەوە، لە کاتێکدا بۆ ساڵی 2024 بەرزدەبێتەوە و دەکرێت بگاتە 123.8 ملیار دۆلار”.
ئاماژەی بەوەشکرد، “عێراق لە پلەی سێیەمی وڵاتانی بەرهەمهێنەری نەوتی عەرەبی بە بەرزترین بەهای هاوردەکردنی کاڵا و خزمەتگوزارییەکان، دوای ئیمارات و سعودیە دێت، کە هاوردەکردنی ئەو دوو وڵاتەی بۆ ساڵی 2022، 303.1 ملیار دۆلار و 252.7 ملیار دۆلار بووە”.
