پزیشكانی پسپۆڕ ئاماژە بۆ ئەوە دەكەن، شێرپەنجەی مێشك هاوشێوەی جۆرەكانی دیكەی شێرپەنجە ناتوانرێت ماوەیەكی زۆر پێش پەرەسەندنی دركی پێبكرێت و نیشانە سەرەتاییەكانی لە جەستەی مرۆڤدا دەربكەون، بەڵام دوای ماوەیەك لە تووشبوونی كەسەكە، دەكرێت لە رێگەی چەند نیشانەیەكەوە هەست بە تووشبوونی بكات.
دكتۆر ستانیسلاف پورزیانیتسا پزیشكی پسپۆڕی گرێ شێرپەنجەییەكان، مەترسی و كاریگەرییەكانی شێرپەنجەی مێشك لەسەر كاركردنی جەستە ئاشكرادەكات و دەڵێت، سەرئێشە، لێڵبوونی بینایی، گرژبوونی ماسوولكەكان، لاوازبوونی پەلەكان و تێكچوونی شێوازی ئاخاوتن رەنگە لە نیشانەكانی تووشبوون بە شێرپەنجەی مێشك بن.
بەپێی وتەی ئەو پزیشكە پسپۆڕە، شێرپەنجەی مێشك كاریگەریی زۆر گەورەی لەسەر فرمانەكانی جەستە دەبێت، لەوانە ئاخاوتن، یادگە، توانای بیركردنەوە و جووڵاندنی ئەندامەكانی جەستە.
ئاماژە بۆ ئەوەش دەكات كە دەكرێت لە كاتی دەركەوتنی هەندێك لەو نیشانانەدا، پەناببرێت بۆ تیشكگرتن بە ئامێر و شێوازەكانی ئێم ئاڕ ئای و سی تی بۆ ئەوەی دۆخەكە یەكلابكرێتەوە.
