بێگەرد تاڵەبانی وەزیری كشتوكاڵ و سەرچاوەكانی ئاوی هەرێم رایدەگەیەنێت، بەمەبەستی داكۆكیكردن لە مافی جوتیارانی هەرێمی كوردستان بۆ زیادكردنی ڕێژەی وەرگرتنی گەنم و رۆیشتنی بەرهەمە كشتوكاڵییەكان بۆ بازاڕەكانی ناوەراست و خواروی عێراق، شاندێكی وەزارەتەكە دەگاتە بەغداد.
راشیگەیاند، “مەبەستی سەردانەكە بەشداریكردنە لە كۆبوونەوەی ئەنجومەنی وەزاریی ئابوریی عێراق، لەسەر بابەتی دیاریكردنی ئەو ڕێژەیەی كە بۆ هەرێمی كوردستان دانراوە و بڕەكەی 375 هەزار تۆنە،كە داوامانكردووە بە هەمان شێوەی شارەكانی تری ناوەڕاست و خوارووی عێراق بێت”.
وتیشی، “لەهەمانكاتیشدا لەسەر بابەتی رێگریكردن لەڕۆیشتنی بەرهەمە كشتوكاڵییەكان بۆ ناوەراست و خوارووی عێراق نامەیەكی ناڕەزایيەتی و داواكاری دەگەیەننە ئەنجومەنی ئابوريی عێراق، بە سوپاسەوە كە سەرۆكایەتيی ئەنجومەن رەزامەندیياندا لە سەر بەشداریكردنی نوێنەرایەتيی وەزارەتی كشتوكاڵ و سەرچاوەكانی ئاوی هەرێم لەو كۆبوونەوەیە بە ئامانجی گەیاندنی كێشە و داواكارییەكانی جوتیاران و پەیامی وەزارەتمان”.
