بنەماڵەی شەهید فرسەت مەلەكی پەیامێك بڵاودەكەنەوە و رایدەگەیەنن، “نامانەوێت هیچ كەس و لایەنێك تاوانبار بكەین، چاوەڕوانی هێزە ئەمنییەكانین بۆ ئاشكراكردنی رووداوەكە و بكەرانی، جەختدەكەنەوە كە خۆیان بە خاوەنی یەكێتی دەزانن و دوای رووداوەكەش بەردەوام یەكێتی پشتیوانیان بووە”.
لە پەیامەكەدا هاتووە، “لە بەرامبەر پەرۆشیی نواندن و بەشداریكردنتان لە رێوڕەسمی بەخاكسپاردن و ڕۆژانی پرسەی شەهید كاكە(فرسەت مەلەكی) بەناوی بنەماڵەكەمانەوە سوپاس و پێزانینی زۆرمان ئاراستەی خزمان و دۆستان و لایەنە حزبی و حكومی و فەرماندەكان و مامۆستایانی ئایینی و كەسایەتی و پیاو ماقولان و گەنجان و لاوان دەكەین كە لەدوای تیرۆركردنی كاكە (فرسەت مەلەكی) لەسەر قەبران و لەپرسەكەدا لەگەڵمان بوون، هەروەها سوپاس و پێزانینمان ئاڕاستەی ئەو دۆست وخزم و كەسانەی دوورە وڵات و ئەوانەی بە تەلەفۆن و بە نامە و لە تۆڕە كۆمەڵایەتییەكان هاوخەممان بوون هاوپرسەیی و هاوخەمیی هەموو لایەكتان كەمێك باری ئەو خەمەی سەرشانمانی سووكتر كرد”.
دەشڵێن، “داوا لە هێزە ئەمنییەكان دەكەین هەوڵەكانیان لەپێناو دۆزینەوە و ڕادەستكردنی تۆمەتباران بە یاسا چڕبكەنەوە و رێگا نەدەن بكەرانی ئەم كردەوە تیرۆریستییە بەبێ سزای یاسايی تێپەڕن، “دەمانەوێت ڕوونی بكەینەوە كاكە (فرسەت مەلەكی) هیچ جۆرە كێشەیەكی سیاسی و كۆمەڵایەتی و كەسی لەگەڵ هیچ كەس و لایەك نەبووە، بە داخەوە لەسەرەتای رووداوەكە چەند كەناڵێك هەوڵی بەلارێدابردنی بابەتەكەیاندا، بەڵام ئێمە وەك بنەماڵەی شەهید فرسەت مەلەكی ئامادەنەبووین لێدوان بۆ هیچ كەناڵێك بدەین، ئێمە نامانەوێت هیچ كەس و لایەنێك تاوانبار بكەین، چاوەڕوانی هێزە ئەمنیەكانین بۆ ئاشكراكردنی رووداوەكە و بكەرانی”.
هەر لە پەیامەكەیاندا هاتووە، “بنەماڵەكەی ئێمە خۆی بە خاوەنی یەكێتیی نیشتیمانیی كوردستان دەزانێت و لەدوای رووداوەكەشەوە یەكێتی نیشتیمانی كوردستان و مەڵبەندی 24ی رێكخستنی راپەڕین بەردەوام لەگەڵماندا بووە و ئامادەیی هەموو جۆرە پشتیوانی و هاوكارییەك بوون سوپاس و پێزانینی زۆرمان ئاڕاستەی یەكێتی و مەڵبەندی 24 ی رێكخستنی راپەڕین دەكەین بۆ خەمخۆری بەپەرۆشیان بۆ رووداوەكە.
