سەرۆکی سەنتەری هەماهەنگیی زانستیی نێودەوڵەتی سەر بە وەزارەتی خوێندنی باڵای ئێران، رایگەیاند، وەزارەت بەنیازە شاندێکی زانکۆکانی رەوانەی عێراق دەکات بۆ راوێژکردن لەسەر کێشەکانی خوێندکارانی عێراقی.
واحید حەدادی ئاماژەی بەوەداوە، بەهۆی بوونی هەندێک کێشە لای خوێندکارانی عێراق کە لە ئێران دەخوێنن، مانگی حوزەیران شاندێکی خوێندنی باڵای ئێران دەچێتە عێراق بۆ چارەسەرکردنی کێشەی خوێندکارانی عێراقی لە ئێران.
سەرۆکی سەنتەرەکە روونیکردەوە، “کاتێک وەزیری خوێندنی باڵای عێراق سەردانی ئێرانی کرد، کۆبوونەوەیەکی بەرهەمدارمان لەگەڵیدا ئەنجامدا، کە تێیدا بڕیارماندا لیژنەیەکی هاوبەش لە نێوان هەردوو وەزارەتەکەدا پێکبهێنین بۆ ئەو مەبەستە”.
وتی، “وەزیری خوێندنی باڵا لیژنە هاوبەشەکەی بانگهێشت کردووە، دوێنێ، بڕیاردرا شاندێکی زانکۆ بنێرین بۆ عێراق، لە چێوەی هاوکاریی هاوبەش و راوێژکاری سەبارەت بە کێشەکانی ئێستا”.
سەرۆکی سەنتەرەکە رایگەیاند، هاوکاریی زانستیی نێودەوڵەتی سەر بە وەزارەتی خوێندنی باڵای ئێران، “ئێستا خەریکی چارەسەرکردنی کێشەی خوێندکارانی عێراقین لە زانکۆ حکومی و ئەهلییەکان”.
جەختیشیکردەوە: “شاندەکەمان رەوانەی عێراق دەکەین لە مانگی حوزەیران بۆ چارەسەرکردنی هەموو کێشەکان”.
