هەڵمەتی نیشتمانیی روواندنی یەك ملیۆن نەمام كە لەسەر بڕیاری بافڵ جەلال تاڵەبانی سەرۆكی یەكێتیی نیشتمانیی كوردستان بۆ سەوزکردنی کوردستان بەڕێوەدەچێت بەردەوامە و گەیشتە قەزای سەیدسادق.
ئەمڕۆ بە ئامادەبوونی قائیمقام و بەڕێوەبەری فەرمانگەکانی سنووری شارەکە، هەڵمەتی روواندنی نەمام لە دارستانی سەراو سەر بە بەڕێوەبەرایەتیی دارستان و پاوانی سلێمانی بەڕێوەچوو.
رەزا محەمەد، قائیمقامی قەزای سەیدسادق رایگەیاند، ناوچەکەیان پێویستی بە زیادکردنی رووبەری دارستان و سەوزاییە، ئەم هەڵمەتەش باشترین پشتیوانییە بۆ گەیشتن بەو ئامانجە.
هاوکات ئازاد فەریق، لێپرسراوی هۆبەی دارستان و پاوانی سەیدسادق رایگەیاند، ئەمڕۆ بە ئامادەبوونی حسێن حەمە کەریم نوێنەری سەرۆک بافڵ جەلال تاڵەبانی و بەڕێوەبەری دارستان و پاوانی سلێمانی دەستیانکرد بە روواندنی نەمام لە شوێنی ئەو دارانەی ساڵانی رابردوو وشکبوون و لەناوچوون.
وتیشی، “هەڵمەتەکە گرنگە بۆ دارستانی سەراو بەوپێیەی رووبەرێکی بەرفراوانی هەیە، پێویستییەکی زۆریشی هەیە بە خزمەت و زیادکردنی رووبەری دارستان”.
