قوباد تاڵەبانی، جێگری سەرۆک وەزیرانی هەرێمی کوردستان، لە پەراوێزی کۆڕبەندی ساڵانەی ئابوریی دێڵفی، ئەمڕۆ پێنجشەممە بە جیا لەگەڵ هەر یەکە لە سانۆس دۆکۆس راوێژکاری ئاسایشی نیشتمانیی یۆنان و یۆریۆس یۆریانتەس وەزیری کشتوکاڵی ئەو وڵاتەدا کۆبووەوە.
بەپێی راگەیەندراوی نووسینگەی جێگری سەرۆک وەزیران، “لە کۆبوونەوەی یەکەمدا لەگەڵ راوێژکاری ئاسایشی نیشتمانی، ئاڵوگۆڕی بیروڕا کرا سەبارەت بە چۆنییەتی پاراستنی سەقامگیری لە عێراق و کوردستان و بەرەنگاربوونەوەی گروپە تیرۆریستییەکان و لەم چێوەیەشدا راوێژکاری ئاسایشی نیشتمانیی یۆنان، ئامادەیی وڵاتەکەی دەربڕی بۆ هاوکاریکردنی هەرێم و بە تایبەتیش لە بواری راوێژدان بە هێزە ئەمنییەکاندا”.
هەردوولا بە پێویستیان زانی هەماهەنگی لەنێوان لایەنە پەیوەندیدارەکانی هەردوو وڵات دروستبکرێت، راگەیەندراوەكە وا دەڵێت و راشیگەیاندووە، “لە کۆبوونەوەی دووەمیشدا لەگەڵ وەزیری کشتوکاڵی یۆنان، تاوتوێی چۆنییەتی پەرەپێدانی پەیوەندییەکانی نێوان هەردوولاکرا لە بواری کشتوکاڵدا، بە تایبەتیش جەختکرایەوە لەسەر گواستنەوەی ئەزموونی یۆنان بۆ کوردستان لەڕووی پێشخستنی کەرتی کشتوکاڵ و ئاودێرییەوە”.
ئاماژەی بۆ ئەوەش كردووە كە قوباد تاڵەبانی لە كۆبوونەوەكەدا رایگەیاندووە، “کوردستان ناوچەیەکی گرنگی کشتوکاڵییە و دەرفەتی لەباریش هەیە بۆ پێشخستنی کەرتی کشتوکاڵ و داوایکردووە هانی کۆمپانیا و وەبەرهێنەرانی یۆنان بدرێت بێنە کوردستان، ئامادەییشی دەربڕیوە هەموو جۆرە کارئاسانییەک بکرێت بۆ کۆمپانیا و وەبەرهێنەرانی ئەو وڵاتە”.
