بەڕێوەبەرایەتیی پۆلیسی هەڵەبجە بڵاویکردەوە، لە سێ رۆژی جەژنی رەمەزاندا لەناو هەڵەبجەدا تەنها یەک رووداوی دزیکردن و یەک رووداوی شەڕکردن و یەک کێشەی خێزانی تۆمارکراوە.
بەڕێوەبەرایەتیی پۆلیسی هەڵەبجە ئەمڕۆ سێشەممە بڵاویکردەوە، “لە سێ رۆژی جەژنی رەمەزان لە سنووری بنکەی پۆلیسی هەڵەبجە تەنها یەک رووداوی دزیکردن تۆمارکراوە کە تۆمەتبار بڕی دوو ملیۆن و 800 هەزار دیناری دزیوە و دواتر دەستگیرکراوە”.
ئاماژەی بەوەشکرد، “یەک دۆسیەی شەڕکردن و یەک دۆسیەی هەڕەشەکردن هەبووە و تۆمەتبارەکان دەستگیرکراون، جگه لەوەش یەک رووداوی کێشەی خێزانی هەبووە”.
هەر لە راگەیەندراوەکەی پۆلیسی هەڵەبجەدا هاتووە، “لە سنووری بنکەی پۆلیسی شەهید سەردار یەک رووداوی دزیکردن و دوو رووداوی هاتوچۆ تۆمارکراون”.
هاوکات لە سنووری بنکەی پۆلیسی خورماڵ یەک دۆسیەی تەقەکردن و یەک دۆسیەی شەڕکردن و یەک دۆسیەی خنکان لە ئاودا تۆمارکراوە، بەڵام لە سنووری بنکەکانی پۆلیسی بیارە و تەوێڵە و بەمۆ هیچ حاڵەتێک تۆمارنەکراون.
