قوباد تاڵەبانی بووە سەرۆكی لیستی هاوپەیمانیی كوردستان

قوباد تاڵەبانی سەرۆكایەتیی لیستی هاوپەیمانیی كوردستانی یەكێتی و گۆڕانی وەرگرت، كە بۆ بەشداری لە هەڵبژاردنی پێشوەختەی عێراق لەنێوان ئەو دوو هێزە پێكهێنراوە.

ئەمڕۆ كۆبوونەوەی باڵای نێوان یەكێتیی نیشتمانیی كوردستان و بزوتنەوەی گۆڕان بەڕێوەچوو، بافڵ تاڵەبانی هاوسەرۆكی یەكێتیی نیشتمانیی كوردستان و عومەر سەید عەلی ڕێكخەری گشتیی بزوتنەوەی گۆڕان سەرۆكایەتیی كۆبوونەوەكەیان كرد، هەردوولا ڕێككەوتن قوباد تاڵەبانی ببێتە سەرۆكی لیستی هاوپەیمانیی كوردستان.

دەقی راگەیەنراوی کۆبوونەوەی یەکێتیی نیشتیمانیی کوردستان و بزووتنەوەی گۆڕان:

ئەمڕۆ پێنجشەممە(٢٩/٧/٢٠٢١)، کۆبوونەوەی باڵای یەکێتیی نیشتمانیی کوردستان و بزووتنەوەی گۆڕان لە مەکتەبی سیاسی یەکێتی لە سلێمانی ئەنجامدرا.

تەوەری سەرەکی کۆبوونەوەکە گفتوگۆکردن بوو لەسەر دوایین گۆڕانکاریی و پێشھاتە سیاسی و ئابوورییەکانی ھەرێمی کوردستان و عێراق و چڕکردنەوەی هەوڵەکان بەمەبەستی خزمەتکردنی زیاتری خەڵک و وەڵامدانەوەی پێداویستییەکانی ھاوڵاتیان.

لە بەشێکی دیکەی کۆبوونەوەکەدا قوباد تاڵەبانی وەک سەرۆکی نوێی ھاوپەیمانی کوردستان پەسەندکرا و ھەردوولا جەختیان لە پشتگیریکردنی ناوبراو و سەرخستنی ھاوپەیمانیەتییەکە کردەوە. لەو چوارچێوەیەدا بڕیاردرا بە کاراکردنی لیژنەکانی هەڵبژاردن و تەواوکردنی ئامادەکارییەکان و چڕکردنی هەماهەنگی نێوان هەردوولا.

بابەتی پێشتر

ڤاكسین، ماسك و خۆپارێزی.. وەزیری ناوخۆ قەدەغەی هاتوچۆ دەبەستێتەوە بە پابەندبوونەوە

بابەتی دواتر

فڕۆكە جەنگییەكانی توركیا گوندەكانی بناری قەندیلیان بۆردومانكرد

بابەتی پەیوەندیدار
Total
1
Share