ماوەی دوو هەفتەیە گرژی و ئاڵۆزییەکان لە سودان بەردەوامیان هەیە و تا دێت دۆخی خەرتومی پایتەخت بەرەو خراپی دەڕوات و بەشێكی زۆر لە زیندانەکانی وڵاتەکە شکێندراون و زیندانییەکانی ناوی هەڵاتوون.
میدیا عەرەبییەکان بڵاویانکردووەتەوە، “لەو گرژی و ئاڵۆزیانەی ماوەی چەندین رۆژە سودانی گرتووەتەوە هێرشکراوەتەوە سەر زیندانی کۆبەر کە ژمارەیەکی زۆر لە زیندانیانی سیاسی بە عومەر حەسەن بەشیر سەرۆکی پێشووی وڵاتەکە و عەلی عوسمان تەهای جێگرییەوە لەخۆگرتووە”.
لای خۆیەوە هێزی پشتیوانی خێرا سوپای سودانی بە کردنەوەی دەرگای زیندانییەکان تۆمەتبارکردووە و ئاشکرایکردووە کە ژمارەیەکی زۆر لە زیندانیان کە بەشێكیان سزای لەسێدارەدانیان هەیە هەڵاتوون.
سەرچاوەیەکیش لە وەزارەتی ناوخۆی وڵاتەکە ئاشکرایکرد، ” سەدان زیندانیکراو لە زیندانەکە هەڵاتوون، بەڵام زیندانیانی سیاسی بەرەو شوێنێکی پارێزراو گواستراونەتەوە وهەڵنەهاتوون”.
لە ساڵی 2019 ەوە عومەر حەسەن بەشیر بە کودەتایەکی سەربازی لە پۆستەکەی دوورخرایەوە و دواتر بە چەندین تاوانی وەک کودەتا، گەندەڵی، جینۆساید و تاوانی دژ بە مرۆڤایەتی دادگاییکرا و تا دەستپێکردنەوەی گرژی و ئاڵۆزییەکان لە وڵاتەکەدا لە زیندانی کۆبەر لە خەرتومی پایتەخت مابووەوە.
