سەرۆكی هەرێمی كوردستان بەبۆنەی جەژنی رەمەزانی پیرۆزەوە پەیامێكی بڵاوكردەوە و پیرۆزبایی لە موسڵمانانی كوردستان و عێراق و جیهان دەكات و دەشڵێت، با هێز و لایەنە سیاسییەكان لە هەرێمی كوردستان و عێراق جەژن بكەنە سەرەتایەكی تازەی یەكڕیزی و تەبایی و كاری پێكەوەیی و كێشە و ناكۆكییەكان چارەسەربكەین.
لە پەیامەكەی نێچیرڤان بارزانی سەرۆكی هەرێمدا هاتووە، بەبۆنەی هاتنەوەی جەژنی رەمەزانەوە، بە گەرمی پیرۆزبایی لە موسڵمانان لە كوردستان و عێراق و هەموو جیهان، بە تایبەتی لە خێزان و كەسوكاری سەربەرزی شەهیدان دەكەم و هیوادارم جەژنی خێر و خۆشی و ئارامی و سەقامگیری بێت و شادی و ئاسوودەیی لەگەڵ خۆیدا بهێنێت.
دەشڵێت، با هەموومان لەسەر ئاستی كەسی، لەگەڵ خۆمان و دەوروبەرماندا جەژن و ماناكانی بكەینە دەرفەتێك بۆ بەخۆداچوونەوە و چاكە و پێكهاتنەوە و لێبوردن و گەردن ئازادی، هەروەها لاپەڕەیەكی نوێی ڕێزلەیەكگرتن و خۆشەویستی و ئاشتەوایی بكەینەوە”.
لە پەیامەكەی نێچیرڤان بارزانیدا هاتووە، لەسەر ئاستی سیاسیش هێز و لایەنە سیاسییەكان لە هەرێمی كوردستان و عێراق جەژن بكەینە سەرەتایەكی تازەی یەكڕیزی و تەبایی و كاری پێكەوەیی و كێشە و ناكۆكییەكان چارەسەربكەین و هەموومان پێكەوە كاربكەین بۆ زامنكردنی ئێستا و داهاتوویەكی باشتر بۆ گەل و وڵاتەكەمان.
