مێرکاتۆی هاوینی 2023 گۆڕانکاری گەورە ڕوودەدات ، چەندین گرێبەستی بەهێز بە نرخی گونجاو واژۆدەکرێن، بەوپێیەی چەندین یاریزانی ناودار گرێبەستەکانیان کۆتاییهاتووە و تاوەکو ئەم ساتە پەیوەندییان بە یانەی دیکەوە نەکردووە.
یاریزانە بێ یانەکان نرخیان بێبەرامبەرە، بۆیە هەندێک لەو یانانەی توانای داراییان لاوازە هەوڵ بۆ گواستنەوەیان دەدەن.
جەیمس ڕۆدریگێز: گرێبەستی لەگەڵ یانەی ئۆڵیمپیاکۆسی یۆنانی هەڵوەشاندەوە.
تەمەنی (31) ساڵە و هاوینی 2020 یانەی ڕیاڵ مەدریدی بەجێهێشت، لەو کاتەوە تاوەکو ئێستا سێ ئەزموونی سەرنەکەوتووی لە یانەکانی ئێڤەرتۆن، ڕەیان، ئۆڵیمپیاکۆس بەڕێکردووە.
ئیسکۆ ئالارکۆن: یەکێکی دیکە بوو لە ئەستێرەکانی ڕیاڵ مەدرید، بەڵام لە هاوینی ڕابردوو ڕوویکردە یانەی ئیشبیلیە.
لە ئێستادا هیچ پەیوەندییەکی بە یانە ئەندەلووسییەکەوە نەماوە و یاریزانێکی بێ یانەیە.
نیکۆلا ماکسیمۆڤیچ: بەرگریکارە سڕبییەکە تەمەنی (31) ساڵە و لە چەندین یانەی گەورە یاریکردووە
دواجار گرێبەستی لەگەڵ جێنەوا کۆتاییهات و لە ئێستادا پەیوەندی بە هیچ یانەیەکەوە نەماوە.
دانی ڕۆز: تەمەنی (32) ساڵە و دوای هەڵوەشاندنەوەی گرێبەستەکەی لەگەڵ واتفۆرد، پەیوەندی بە هیچ یانەیەکی دیکەوە نەکردووە.
حاتەم بن عەرفە: تەمەنی (36) ساڵە و بۆ دوایین جار لەگەڵ یانەی لیل یاریکرد، لە ئێستادا بۆ هیچ یانەیەک یاری ناکات.
ماکس کروز: هێرشبەرە ئەڵمانییەکە لە 2022وە بێکارە، تەمەنی 35 ساڵە و بۆ دوایین جار یانەی ڤۆلفسبۆرگ گرێبەستەکەی هەڵوەشاندەوە.
ئەلیکساندەر پاتۆ: ئەستێرەی ناوداری بەڕازیل، لە تەمەنی (33) ساڵیدایە و هێشتا بەهۆی پێکانەوە دەناڵێنێت.
لە سەرەتای ساڵی 2023 گرێبەستی لەگەڵ یانەی ئۆرلاندۆی ئەمریکی کۆتاییهات.
سەفیر تایدەر: یاریزانەکەی جەزائیر تەمەنی (31) ساڵە، گرێبەستی لەگەڵ یانەی عەینی سعوودی کۆتاییهاتووە.
ئیلکایم مانگالا: یەکێکبوو لە گرانبەهاترین بەرگریکارەکانی جیهان، لە تەمەنی (32) ساڵیدا لە تەمموزی 2022 گرێبەستی لەگەڵ یانەی سانت ئیتیان کۆتاییهات.
لەو کاتەوە تاوەکو ئێستا بۆ هیچ یانەیەک یاری نەکردووە.
دانی درینکۆتەر: لە هاوینی 2022وە گرێبەستی لەگەڵ چێڵسی کۆتاییهاتووە.
تەمەنی (33) ساڵە و بۆ هیچ یانەیەک یاری ناکات.
