هێنانی هونەرمەندی تورک ئیبراهیم تاتڵیساس بۆ هەولێر و ئەو پێشوازییەی لەو شارە لێیکرا، لەلایەن هاوڵاتییان و کەسایەتییەکانەوە کاردانەوەی لێکەوتەوە و هاوڵاتییەک نووسیویەتی، “هێنانی تاتڵیساس تەنها بۆ لەبیربردنەوەی سەرتاشینەکەیە و هیچی تر”.
هاوڵاتییەک بەناوی سەردار قادر لە تۆڕی کۆمەڵایەتیی فەیسبوک نووسیویەتی، “دەسەڵاتی هەولێر هەموو کات بۆ ئەوەی بابەتە گرنگ و گشتییەکان لەبیر خەڵک بباتەوە، بابەتێکی تر دروستدەکات و سەرجەم میدیا و رایگشتیی پێوە سەرقاڵ دەکات و چەواشەیان دەکات بۆ ئەوەی سەرنجیان لەسەر بابەتە سەرەکییەکە نەمێنێت، کە شکاندنی شکۆی مرۆڤە لەژێر دەسەڵاتی پارتی و بارزانی”.
ئاماژە بۆ هاتنی هونەرمەندی تورک ئیبراهیم تاتڵیساس دەکات و دەڵێت، “هێنانی تاتڵیساس لەم کاتەدا تەنها بۆ لەبیربردنەوەی مەسەلەی سەرتاشینەکەیە و هیچی تر”.
“مەسەلەی سەرتاشین” کە ئەو هاوڵاتییە ئاماژەی بۆ کردووە، مەبەست لێی ئەو پارێزەرەیە کە لە چەند رۆژی رابردوودا رایگەیاند لەلایەن چوار کەسەوە رفێنراوە و سەریان تاشیوە و ئەشکەنجەیان داوە و بریندارکراوە.
ئەمە لەکاتێکدایە پێشتر چەند حاڵەتێکی دیکەی رفاندن، لێدان و سەرتاشین لە هەولێر روویانداوە.
