بڕیارە ئەمڕۆ شاندێكی لیژنەی ئاسایش و بەرگریی ئەنجومەنی نوێنەرانی عێراق، بە مەبەستی لێكۆڵینەوەكردن لە رووداوی هێرشكردنەسەر فڕۆكەخانەی نێودەوڵەتیی سلێمانی، سەردانی شارەكە بكەن.
د. كەریم شكور جێگری سەرۆكی فراكسیۆنی ی. ن. ك لە ئەنجومەنی نوێنەران بە ئێستای راگەیاند، بڕیارە شاندەكە كاتژمێر 11ـی پێش نیوەڕۆی ئەمڕۆ دووشەممە بگەنە فڕۆكەخانەی نێودەوڵەتیی سلێمانی و وەك فراكسیۆنی یەكێتی پێشوازییان لێدەكەن.
وتیشی، دوای لێكۆڵینەوەكردن لە شوێنی رووداوی هێرشەكەی سەر فڕۆكەخانەكە، شاندەكە بۆ هەمان مەبەست سەردانی ئەنجومەنی پارێزگای سلێمانی دەكەن و لەوێش كۆبوونەوەیان دەبێت.
دوای هێرشەكەی سەر فڕۆكەخانەی نێودەوڵەتیی سلێمانی، موحسین مەندەلاوی جێگری یەكەمی سەرۆكی ئەنجومەنی نوێنەران رایگەیاندبوو، لیژنەیەك بۆ لێكۆڵینەوە لە هێرشەكە پێكدەهێنن بۆ ئەوەی راپۆرتی بەپەلە پێشكەشبكات “لەپێناو گرتنەبەری ئەو رێكارانەی، كە سەروەریی عێراق و گیانی هاوڵاتییانمان لە بەرامبەر هەر دەستدرێژییەكدا دەپارێزن”.
