غەریب ئەحمەد، پەرلەمانتاری فراكسیۆنی یەكێتی لە ئەنجومەنی نوێنەرانی عێراق لێدوانێكدا بە تۆڕی میدیایی ئێستای راگەیاند، “لەگەڵ محەمەد شیاع سودانی سەرۆك وەزیرانی عێراق دیدار و گفتوگۆمان ئەنجامدا و لە دیدارەكەدا، سەرۆكی حكومەتی عێراق باسی لە پلان و ستراتیژی حكومەت بۆ خزمەتكردنی خاك و گەلانی عێراق كرد و ئاماژەی بەوەدا، لە گفتوگۆكاندا دەركەوت كە گەلی كورد لەلای سەرۆك وەزیرانی عێراق جێگەی بایەخ و خزمەتی رەهان بۆیە چەند پێشنیارێكم خستە بەردەم سەرۆك وەزیرانی عێراق.
ئەو پەرلەمانتارەی یەكێتی ئاشكرایكرد، پێشنیارەكانی بۆ محەمەد شیاح سودانی، بریتیبوون لە:-
1.لە بودجەی ئەمساڵدا مافی كورد پارێزراوبێت ئەم مافەی هەیەتی تێكەڵ بە هاوكێشە سیاسیەكان نەكرێت.
2.لە كەرتی كشتوكاڵدا داوامانكرد هاوشێوەی جوتیارانی پارێزگاكانی عێراق پشتیوانی جوتیارانی هەرێم بكرێت لە دابینكردنی ماف و پێداویستیەكان.
3. ڕەزامەندی بۆ دروستكردنی چەند بەنداوێكی بچووك لە هەرێم بە گشتی و سنووری ئیدارەی راپەڕین بە تایبەت.
4. فرۆشتنی بەرهەمە خۆراكییە نێوخۆییەكانی جوتیارانی هەرێم لە شارەكانی عێراق كاری جددی لەسەر بكرێت و رێگری لە هاوردەی بەرهەمە دەرەكییەكان بكرێت، بەمەش كەرتی كشتوكاڵ و وزەی جوتیاران لە برەودا دەبێت هاوكات دابینكردنی تراكتۆر و دەڕاسە و هتد.. بۆ جوتیاران.
5.كردنەوەی بانكی كشتوكاڵی لە سلێمانی و هەولێر بۆ سوودمەندبوونی جوتیاران لە پێشینەی كشتوكاڵی (سولفە) بە مەرجێك سوود (ریبا)ی نەچێتە سەر.
ئەو پەرلەمانتارە باسی لەوەش كرد، “كە لە كۆتاییدا پێزانینی گەلی كوردستانم گەیاندە سەرۆك وەزیرانی عێراق لەپای ڕەزامەندیان لەسەر ١٩یەمین پارێزگای عێراق، كە هەڵەبجەی شەهیدە”.
