مەكتەبی سیاسیی یەكێتی لە ساڵڕۆژی رووخاندنی رژێمی بەعسی دیكتاتۆرتدا پەیامێكی بڵاوكردەوە و داوادەكات، بیری تاكڕەوی و خۆسەپێنی كۆتایی پێبهێنرێت.
لە پەیامەكەی مەكتەبی سیاسیی یەكێتییدا هاتووە، ئەمڕۆ كە یادی بیست ساڵەی رووخاندنی ڕژێمی بەعسی دیكتاتۆردەكەینەوە ، ئەو وانەیە وەبیر هەموو لایەك دەهێنێتەوە كە ئەو ڕژێمەی بە زەبری هێز و كوشت و بڕی گەلانی عێراق و خنكاندنی گشت مافە ئازادی و دیموكراتیەكان سی وپێنج ساڵ جڵەوی حوكمی لەدەستدا بوو، سەرئەنجامەكەی رووخان و كەوتن بوو.
لە پەیامەكەدا هاتووە، لە عێراقی نوێی دوای بیست ساڵەی رووخانی دیكتاتۆریدا زیاتر پێویستمان بە هەنگاوەكانی پێكەوەیی كاركردنە لە چوارچێوەی عێراقێكی فیدڕاڵیدا كە ئەرك و مافەكانی هاوڵاتییانی وەك یەك تێدا جێبەجێبكرێت و ئارامی و ئۆقرەیی بۆ هەموان دابینبكرێت تاوەكو گشت ناوچەكان لەهەر هەڕەشە و پەلامارێكی دەرەكی پارێزراو بێت.
لە كۆتایی پەیامەكەدا هاتووە، هەرلەم یادەدا ئومێدەوارین بیری تاكڕەوی و خۆسەپێنی كۆتایی پێبهێنرێت و بەرژەوەندییە گشتییەكانی گەلەكەمان بخرێنە پێش و سەروو بەرژەوەندییە كەسی و حزبیەكانەوە و واز لەچاوساغی وپەلكێشی دەرەكی بۆسەرخاك و ئاسمانی عێراق و هەرێمی كوردستان بهێنرێت.
