ئەندامێكی ئەنجومەنی نوێنەران رایدەگەیەنێت، بانکی ناوەندیی عێراق لیژنەیەکی دیکەی وردبینی لەسەر بانکی کوردستان پێکھێناوە.
سۆران عومەر، ئەندامی ئەنجومەنی نوێنەرانی عێراق رایگەیاند، دوای نوسراوێكی بە ژمارە (537) لە (2023/4/3) كە ئاراستەی بانکی ناوەندی عێراقی کردووە، لەسەر چەند بابەتێکی گرنگی پەیوەست بەبانکی کوردستان، بانکەكە بە نوسراوی ژمارە (9706) لە (2023/4/3) ئاگاداریان كردووەتەوە كە لیژنەی وردبینی لەسەر بانکی کوردستان پێکھێناوە.
“کەرتی بانکی لە عێراق لە رابردوودا سەرچاوەی سەرەکیی سپیکردنەوەی پارە بووە و زیانی بە ئابوریی وڵات گەیاندووە” ئەو پەرلەمانتارە وا دەڵێت.
ئەوەشی خستەڕوو، بانکی ناوەندی ماوەیەکە دەستی بە چاودێریی زیاتر و لێپرسینەوە لەسەر کارە نایاساییەکانی چەندین بانک لە عێراق و ھەرێمی کوردستان كردووە.
هەفتەی رابردووش بانکی ناوەندی بڕیاریدا بانکی کوردستان قەدەغەبکات لە دەرکردنی (خطاب ضمان) لە رێگەی سەکۆی ئەلیکترۆنی و بەشداریكردن لەو پەنجەرەیەدا و بێبەشی دەکات لە پێدانی ئەو قەرزانەی كە بانکی ناوەندی دەیاندات.
بە وتەی ئەو پەرلەمانتارە، بانکی ناوەندی لێکۆڵینەوە لەگەڵ بانکی کوردستان و کەسی بەرپرسیار لەسەر شاردنەوەی پارەیەکی کۆبووەوە لە هالک بانکی تورکی دەستپێدەکات، کە پێویستە لە ماوەی مانگێکدا ئەنجامەکەی دەربچێت و هەموو ئەو راوێژکارانەش دەردەکرێن کە بەبێ رەزامەندیی بانکی ناوەندی هێنراونەتە بانکی کوردستان.
