عەلی حەمەساڵح رایدەگەیەنێت، پشكی هەرێم لە بودجەی ئەمساڵدا گەورەترین بڕە لە مێژووی حوکمڕانیی هەرێمدا و دەشڵێت، هەرێمی نیوەی داهاتە فیدراڵییەکان و کۆی داهاتە نا فیدراڵییەکانیشی بۆ دەمێنێتەوە.
عەلی حەمەساڵح، پەرلەمانتاری دەستلەكاركێشاوەی پەرلەمانی كوردستان رایگەیاند، لە پرۆژەیاسای بودجەی عێراقدا پارەی تەرخانکراو بۆ هەرێمی کوردستان بریتییە لە 16 ترلیۆن و 609 ملیار و 693 ملیۆن و 162 هەزار دینار.
دەشڵێت، “ئەمەش گەورەترین بڕە پارەیە لە مێژووی حوکمڕانی هەرێمدا. ئەم پارەیە بۆ مووچە، خەرجی بەکاربردن و پرۆژەیە”.
جگە لەو پشكە هەرێمی کوردستان نیوەی داهاتە فیدراڵییەکان و کۆی داهاتە نافیدراڵییەکانی بۆ دەمێنێتەوە، کە یەک ترلیۆن دینار زیاترە، وەك ئەوەی عەلی حەمەساڵح ئاماژەی پێداوە.
ئەوەش دەخاتەڕوو، خەرجیی نەوت لەم پارە نادرێت. سەرەڕای ئەوەی ئەو پارەیەی بۆ هەرێم تەرخانکراوە نزیکەی دوو هێندە و نیوی ئەو پارەیەیە لە داهاتی نەوت بەدەستدێت.
