لە کۆشکی سپی، کۆشکی سەرۆکایەتیی ئەمریکا ئاهەنگێکی تایبەت بە جەژنی نەورۆز بەڕێوەدەچێت، بەوبۆنەیەوە جۆ بایدنی سەرۆکی ئەمریکا بانگهێشتی بەهمەن قوبادی دەرهێنەری نێودەوڵەتیی کوردی کردووە بەمەبەستی بەشداریکردنی وەک کەسایەتییەکی کورد.
بەهمەنی قوبادی لەلایەن جۆ بایدن و جیل بایدنی هاوسەرییەوە بانگهێشتکراوە بۆ بەشداریکردن لەگەڵ ئاهەنگی جەژنی نەورۆز لە کۆشکی سپی.
ئاهەنگەکە سبەینێ سێشەممە 21ی ئازار بەڕێوەدەچێت و پێشبینی دەکرێت ژمارەیەک کەسایەتیی دیار ئامادەی ئاهەنگەکەبن.
ئەمڕۆ و سبەینێ کوردانی جیهان بەبۆنەی رۆژی نەورۆزەوە ئاهەنگ و چالاکی جۆراوجۆر دەگێڕن، نەورۆز یەکەم رۆژی سەری ساڵی کوردییە و نەتەوەی فارسیش بە جەژنی خۆیانی دادەنێن و لەم رۆژەدا ئاهەنگی تایبەت دەگێڕن.
