تێنسزان و ئەفسانەی ئیسپانیا، ڕافائێل نادال قۆناغی چارەسەربوونی لە پێکان تێپەڕاندووە و بڕیاریداوە بەشداری پاڵەوانێتی ماستەرزی مۆنتی کارلۆ بکات.
دوای کشانەوە لە پاڵەوانێتییەکانی ئیندیانا وێڵز و مەیامی، ڕافائێل نادالی ئیسپانی پێکانی ماسولکەی ڕانی تێپەڕاندووە و دەستی بە مەشق و ڕاهێنانەکان کردووەتەوە.
سەرچاوەکانی فەرەنسا و ئیسپانیا ئاماژەیان بەوەشکردووە، کە “ماتادۆر” یەکەمین کەس بووە ناوی خۆی ئاراستەی ڕێکخەرانی پاڵەوانێتی ماستەرزی مۆنتی کارلۆی فەرەنسی کردووە، کە ئەوەش واتای گەڕانەوە و بەشداریکردنی لە پاڵەوانێتییەکە دەگەیەنێت.
پاڵەوانێتی مۆنتی کارلۆ لە نێوان نۆ بۆ (16)ی نیسان (مانگی داهاتوو) لە مۆناکۆ – فەرەنسا ئەنجامدەدرێت.
نادال لە ژیانی وەرزشیی خۆیدا (11) جار ناسناوەکەی چنیوەتەوە، هەشت جار یەک لەدوای یەک بووە و ئەوەش خۆی لە خۆیدا ڕیکۆردێکی جیهانییە، لەنێوان 2005 بۆ 2012 تۆمارکراوە.
