فەرمانگەى خۆراك و دەرمان له ئەمریكا پشتڕاستیكردەوە، ڤاكسینى ڤایرۆسى كۆرۆناى نوێ كە كۆمپانیاى مۆدێرنا په‌ره‌یپێداوه، ده‌كرێت متمانه‌ی پێبكرێت.
بەپێی لێكۆڵینەوەیەك كە فەرمانگەى خۆراك و دەرمان له ئەمریكا (FDA) بڵاویكردووەتەوە، پشتڕاستی ئه‌وه‌ی كرده‌وه كه ڤاكسینه‌كه‌ی كۆمپانیاى مۆدێرنا كە ناوەندەكەى لە ئەمریكایە “جێگه‌ی متمانه‌یه و به‌كارهێنانی كاریگه‌ره”.
لێكۆڵینەوەكە كە لە 54 لاپەڕە پێكهاتووە، ئەوە دوپاتكردوەتەوە كە ڤاكسینەكە لەسەر نزیكەى 30 هەزار كەس تاقیكراوەتەوە و كاریگەرى لە 94% بووە، مەترسییەكى تایبەتى متمانەیى هەڵنەگرتووە و جگە لەو نیشانانە بڵاوانەى وەكو تا، سەرئێشە و ئێشى ماسولكە و جومگەكان هیچ كاریگەرییەكى لاوەكى نییە.
رۆژى پێنجشەممە، ڤاكسینەكەى مۆدێرنا لەلایەن پانێلێكى شارەزایان كە FDA لە زانایانى سەربەخۆ پێكهێنراوە، هەڵسەنگاندنى بۆ دەكرێت و بڕیار لەسەر بەكارهێانى بەپەلەى دەدرێت یان نادرێـت.
لە ئەگەرى پەسەندكردنى ڤاكسینەكەى مۆدێرنا بە شێوەیەكى فەرمى، دەبێتە دووەم ڤاكسین كە پاش هەفتەیەك لە دواى ڤاكسینەكەى ڤایزەر لە ئەمریكا پەسەندكرابێت.
